Xulio Fernández Gayoso

Xulio Fernández Gayoso

Biografía
Nacemento	8 de decembro de 1931 (92 anos) Vigo, España
Actividade
Ocupación	empresario, banqueiro
Empregador	Novacaixagalicia
Premios
(2002)  Medalla Castelao  Medalla ó Mérito no Traballo

Julio Fernández Gayoso, nado en Vigo o de 8 de decembro de 1931, é un directivo financeiro galego, ex-director xeral e expresidente da Caixa de Aforros Municipal de Vigo, Caixanova, e ex-copresidente de Novacaixagalicia.

Traxectoria

En 1947 comezou a traballar na Caixa de Aforros e Monte de Piedade Municipal de Vigo, sendo nomeado director executivo en 1965. No ano 2000, trala fusión da Caixa de Vigo coa Caixa de Aforros Provincial de Ourense e a Caixa de Aforros Provincial de Pontevedra, pasou ao cargo de director xeral de Caixanova, sociedade da que foi nomeado presidente en xuño de 2006. Trala fusión desta entidade con Caixa Galicia, pasou a ser copresidente de Novacaixagalicia.

Ocupou diversos cargos en empresas participadas por estas entidades financeiras, sendo presidente de Lico-Corporación, vicepresidente do grupo R e do Banco Gallego. Pertenceu ao consello de administración da Confederación Española de Cajas de Ahorros (CECA), Caser, Lico-Leasing, Ahorro Corporación Financiera, Grupo Cable e Inversiones Estratégicas de Galicia.

É socio fundador da Fundación Empresa Universidad Gallega, a Fundación FIES (Fondo para a Investigación Económica e Social), e a Fundación Pro-Vigo. Foi membro de diversos padroados, como o Centro Galego de Arte Contemporánea, a Fundación Laxeiro ou a Fundación Camilo José Cela.

O 25 de xuño de 2012 a fiscalía anticorrupción presentou unha querela contra el e outros catro directivos por ocultar a finais de 2010 ao Consello de Administración e ao Banco de España o importe dunhas prexubilacións ás que presuntamente non tiñan dereito varios dos seus directivos. Tres días despois, presentou a súa dimisión como copresidente de Novacaixagalicia

Fernández Gayoso nun intre da comparecencia na comisión de investigación das caixas no Parlamento de Galicia o 21 de xuño de 2013.

Recoñecementos

En 1970 foille concedida a Medalla individual "ao mérito no aforro" do Ministerio de Facenda. En 1982 recibiu a insignia de Ouro da Universidade de Santiago de Compostela. En 1983 foi nomeado Comendador da Orde do Mérito Civil. Recibiu en 1998 a medalla "ao mérito no aforro" da CECA, e en 1999 a medalla de ouro da Cámara de Comercio de Vigo e a medalla de ouro do Club Financeiro de Vigo. En 2002 recibiu a Medalla Castelao.

Tamén no ano 2002 recibiu o doutoramento honoris causa pola Universidade de Vigo, sendo reitor Domingo Docampo, nun acto presidido por Manuel Fraga e apadriñado por Abel Caballero. En febreiro de 2016 anunciouse a súa renuncia á distinción.

En 2006 recibiu a Medalla de Mérito ao Traballo na categoría de Ouro, pero o Ministerio de Traballo e Economía Social do Goberno de España retiroulla en 2024.

Véxase tamén

Bibliografía

• "Fernández Gayoso, Julio". Gran Enciclopedia Galega Silverio Cañada (DVD). El Progreso. 2005. ISBN 84-87804-88-8. 
• Barrera, F., ed. (2002). Gallegos. Quién es quien en la Galicia del siglo XXI. El Correo Gallego. p. 203. ISBN 84-8064-113-4. 

Ligazóns externas

• Julio Fernández Gayoso en Galegos.info